Implantet dentare janë vida të vogla prej titani që vendosen në kockën e nofullës për të zëvendësuar rrënjët e dhëmbëve të humbur. Pas një periudhe shërimi, mbi to montohet një kurorë, urë ose protezë që imiton pamjen dhe funksionin e dhëmbëve natyralë. Ky proces ndihmon në ruajtjen e strukturës së fytyrës dhe parandalon humbjen e mëtejshme të kockës së nofullës.
Ura mbi implante dentare
Shërben për të zëvendësuar 3 ose më shumë dhëmbë. Vendosja e urës mbi implante dentare kryhet me të njëjtën procedurë si vendosja e saj mbi dhëmbët e vërtetë. Është një alternativë shumë efikase, që zgjidh situatat kur pacienti ka një mungesë të konsiderueshme dhëmbësh, qoftë në nofullën e poshtme, qoftë në atë të sipërme.
Teknika All-on-4
Kjo teknikë është në parim e njëjtë me vendosjen e protezës fikse mbi gjashtë implante, por në këtë rast përdoren 4 implante që shërbejnë për fiksimin e protezës. Zgjedhja midis teknikës me gjashtë ose me katër implante varet nga dendësia e kockës së pacientit dhe nga kushte të tjera mjekësore që duhet të plotësohen. “All-on-4” është e përshtatshme kur:
- Pacienti nuk ka asnjë dhëmb në njërën nga nofullat
- Pacienti vuan nga sëmundja periodontale (paradontoza)
- Pacienti nuk ka dendësi të mjaftueshme të kockës së nofullës
Të dyja teknikat, protezë fikse mbi katër apo mbi gjashtë implante, janë një mënyrë shumë efikase për të hequr njëherë e përgjithmonë protezat e lëvizshme dhe për të rikthyer ndjesinë e të paturit dhëmbët tuaj.
Teknika All-on-6
Nëse keni humbur të gjithë dhëmbët ose mbani proteza të lëvizshme, një mënyrë shumë efikase për të rikthyer ndjesinë e të paturit dhëmbët tuaj është metoda “all-on-6”. Falë kësaj teknike mund t’u thoni lamtumirë protezave të vjetra dhe t’i zëvendësoni me proteza fikse të vendosura mbi 6 implante. Me këtë teknikë moderne dhe inovative është e mundur të vendosen të gjithë dhëmbët (12 ose 14 dhëmbë), si në nofullën e poshtme, ashtu edhe në atë të sipërme.
Si aplikohet kjo teknikë?
Vendosja e protezës fikse mbi 6 implante bëhet në dy faza.
- Faza e parë konsiston në vendosjen e implanteve.
- Faza e dytë, që vjen pas tre ose gjashtë muajsh, konsiston në vendosjen e protezës fikse.
Në klinikën tonë ofrojmë edhe proteza provizore gjatë pritjes 3- ose 6-mujore për integrimin e implanteve me kockën, në mënyrë që pacienti të mos e humbasë plotësisht funksionin, dhe sigurisht as estetikën, gjatë kësaj periudhe.
